Қаржы және өнеркәсіп министрліктері автокөліктерді "сұр" жолмен әкелуге қарсы бағдарлама әзірлейді
Жаңа тәсілдер 2026 жылдың 1 қыркүйегінен бастап күшіне енеді.
AutoReport редакциясы
Қаржы министрлігі Өнеркәсіп және құрылыс министрлігімен бірлесіп, Қазақстан аумағына көлік құралдарын әкелуге қатысты қолданыстағы заңнаманы түсіндірудің "нақты" ұстанымын әзірлеуі тиіс. Тиісті тәсілдер 2026 жылдың 1 қыркүйегінен бастап күшіне енеді, мұндай тапсырманы Үкімет отырысында Премьер-министр Олжас Бектенов екі ведомствоға жүктеді.
Оның айтуынша, Қазақстанға "сұр" схемалармен әкелінген автокөліктер елдің техникалық және экологиялық талаптарына сәйкес келмейді.
"Қолда бар деректерге сәйкес еліміздің аумағына көлік құралдарын заңсыз әкелу фактілері әлі де тіркелуде. Мұндай көліктердің басым бөлігі техникалық және экологиялық талаптарға сай келмейді. Бұл, соның ішінде кедендік заңнама нормаларын құқықтық қолдану тәжірибесіндегі олқылықтарға да байланысты. Қаржы министрлігі Өнеркәсіп министрлігімен бірге он күн ішінде автокөліктердің ел аумағына заңсыз әкелінуіне жол бермеу жөнінде шаралар кешенін әзірлесін", - деді Олжас Бектенов.
Ұлттық статистика бюросының деректері бойынша, 2025 жылы Қазақстанға 257 225 көлік құралы импортталды. Бұл 2024 жылмен салыстырғанда 52,5%-ға көп. Басым бөлігін жаңа және пайдаланылған жеңіл автокөліктер құрайды, олардың 236 860 бірлігі жалпы сомасы 2,8 млрд долларға әкелінді. Бұл бір жыл бұрынғы көрсеткіштен 56,7%-ға көп.
Бұл ретте елде ресми түрде 234 852 жаңа жеңіл және коммерциялық автокөлік сатылды. Бұл 2024 жылмен салыстырғанда 14,4%-ға көп. Айта кетейік, олардың бір бөлігі импорттық болып табылса, бір бөлігі Қазақстан аумағында шығарылған.
