Қытайда жеңіл автокөліктер нарығының 2027 жылы қалпына келуі күтілуде. Қытайдың Жеңіл автомобильдер қауымдастығының болжамы бойынша, бұл 2026 жылы сатылымның күрт төмендеуінен кейінгі "қалыпты өсім" болмақ.

Болжамға сәйкес, 2026 жылдың қорытындысы бойынша Қытайда жаңа жеңіл автокөліктердің сатылымы 18,5 млн бірлікті құрайды. Бұл 2025 жылғы ең жоғары көрсеткішпен салыстырғанда 22%-ға аз. Ол кезде 23,7 млн автокөлік сатылған. Бұл көрсеткіш тіпті дилерлер шамамен 19,3 млн автокөлік сатқан 2020 жылғы деңгейден де төмен.

Қытайдың Жеңіл автомобильдер қауымдастығы 2027 жылы сатылым көрсеткіштері 2%-дан 5%-ға дейін өседі деп күтеді. Алайда бұл көрсеткіш 2025 жылғы рекордтық деңгейден әлі де төмен болады.

2026 жылдың қаңтарынан қыркүйегіне дейін Қытайда 13,3 млн жаңа жеңіл автокөлік сатылды. Бұл өткен жылдың сәйкес кезеңімен салыстырғанда 21,7%-ға аз.

Сарапшылар сатылымның төмендеуін бірнеше өзара байланысты факторлармен түсіндірді. Олардың қатарында жеңілдіктер жүйесі өзгергенге дейін жасалған сатып алулар, ескі автокөліктерді жаңасына айырбастауға арналған субсидиялар тиімділігінің төмендеуі, мұнай бағасының қымбаттауы, сондай-ақ микрочиптер мен аккумулятор материалдарына жұмсалатын шығындардың артуы бар. Тұтынушылардың сатып алу белсенділігінің төмендеуі де жағдайды ушықтырған.

Қолданыстағы салық ережелеріне сәйкес, 2025 жылы жаңа энергетикалық автокөліктерді сатып алу салығынан толық босату қарастырылған. Ал 2026 және 2027 жылдары салық мөлшері 50%-ға төмендетіледі. Бұл ретте бір жеңіл автокөлікке берілетін салықтық үнемдеу 15 мың юаньмен (181,8 мың теңге) шектелген.

Бұған дейін Қытайдың Өнеркәсіп және ақпараттық технологиялар министрлігі инновациялық автокөліктерге бақылауды күшейтуге арналған заң жобасын жариялаған болатын. Құжат 51 техникалық параметрді қамтиды. Оның 41-і инновациялық әзірлемелерге, ал 10-ы зерттеулерге, әзірлемелер мен сынақтарға, сондай-ақ нәтижелердің шынайылығын тексеруге қатысты. Тиісті сынақтардан өтпеген модельдер немесе өтінімдерінде тексеру нәтижелерінің шынайылығы туралы жалған мәліметтер көрсетілген автокөліктер мақұлданбайды.