Сарапшы қазақстандықтардың бензинге қанша жұмсайтынын есептеді

Қазақстанда ең көп бензинді қозғалтқыш көлемі 1,5-тен екі литрге дейінгі автокөліктер тұтынады. Себебі – осы топтың санында, деп жазады Автомобиль нарығын мониторингтеу және талдау агенттігінің директоры Артур Мискарян өзінің telegram-арнасында.

Сарапшы қазақстандықтардың жылына орта есеппен бензинге қанша жұмсайтынын есептеп шықты. Ол келтірілген есептеулер автопарктегі ең көп тараған модельдердің паспорттық отын шығыны туралы орташа деректерге негізделгенін нақтылады. Есептеу кезінде ол АИ-92 бензинінің бағасын литріне 246 теңге, ал АИ-95 бензинін – литріне 312 теңге деп алды.

Осылайша, жылына 25 мың шақырым жүріс кезінде және АИ-92 бензинін пайдаланғанда қозғалтқыш көлемі 1,5 литрге дейінгі автокөлікті шамамен 400 мың теңгеге, моторы 1,5-тен екі литрге дейінгі көлікті – 492 мың теңгеге, екіден 2,5 литрге дейінгісін – 553,5 мың теңгеге, 2,5-тен төрт литрге дейінгісін – 738 мың теңгеге, төрт литр және одан жоғарысын – 1,1 млн теңгеге жанармаймен толтыру қажет болады.

Егер АИ-95 бензинін пайдалансаңыз, онда жылына 25 мың шақырым жүріс кезінде қозғалтқыш көлемі 1,5 литрге дейінгі автокөлікке 507 мың теңге, моторы 1,5-тен екі литрге дейінгісіне – 624 мың теңге, екіден 2,5 литрге дейінгісіне – 702 мың теңге, 2,5-тен төрт литрге дейінгісіне – 936 мың теңге, төрт литр және одан жоғарысына – 1,4 млн теңгеге жанармай құясыз.

"Жыл сайынғы жанармай шығыны бойынша ең жоғары топ – қозғалтқыш көлемі 1,5-тен екі литрге дейінгі автокөлік иелері, бұл топтың санымен түсіндіріледі: 1 қыркүйектегі жағдай бойынша бұл 2,1 млн бірлік авто", – деп жазады Артур Мискарян.

Ол елдің автопаркін толықтыру мен жаңарту жүзеге асырылатын автокөліктердің құрамын ескере отырып, алдағы уақытта жанармай тұтынудың негізгі өсуі дәл осы топтың есебінен болатынын атап өтті.

Еске сала кетейік, 2025 жылдың желтоқсанының қорытындысы бойынша Қазақстанда бензиннің бөлшек сауда бағасы бір жылда 15,7%-ға өсті. Қымбаттау ауқымы бойынша бұл соңғы бес жылдағы ең байқалған секірістердің бірі болды. Өткен жылы тек 0,8%-ға өсім тіркелген болатын.