Қазақстанда жол ережесін жүйелі түрде бұзғаны үшін жүргізуші куәлігінен айырады
Елде баллдық жүйе енгізіледі.
AutoReport редакциясы
Ішкі істер министрлігі Құрылтайдың қарауына заң жобасын енгізуді жоспарлап отыр, оған сәйкес жол жүрісі қағидаларын бұзған жүргізушілерге айыппұлдармен қатар, қайталанған және ауыр бұзушылықтар үшін жүргізуші куәлігінің қолданылуы бір жылға тоқтатылатын болады. Бұл туралы Үкімет отырысында ведомство басшысы Ержан Сәденов мәлімдеді.
Отырыс барысында Қазақстан Премьер-министрі Олжас Бектенов 2026 жылы елді мекендердің ішінде де, тасжолдарда да жол-көлік оқиғаларының азайғаны байқалатынын атап өтті. Қаза болғандар мен жарақат алғандар саны да төмендеген.
Премьер-министр мұны жүргізіліп жатқан превентивті жұмыстармен байланыстырады – жол қауіпсіздігін күшейтуге бағытталған бірқатар заңнамалық нормалар қабылданды, жол бұзушылықтары үшін қылмыстық және әкімшілік жауапкершілік қатаңдатылды, сондай-ақ самокаттар мен скутерлерді пайдалану, жүргізушілерді даярлау және жасырын патрульдеу жүргізу мәселелері реттелді.
"Сонымен қатар, оқиғалардың жалпы азайғанына қарамастан, елдегі апаттылық деңгейі әлі де жоғары болып отыр. Жүргізушілер белгіленген ережелерді, нормаларды және жолдағы жүріс-тұрыс мәдениетін сақтамайды. Жиі жүргізушілер қоғамдық көлікке арналған жолақпен жүреді, қос тұтас сызықты кесіп өтеді және рұқсат етілген жылдамдықты асырады. Мұндай фактілердің жолын кесіп, тиісті шаралар қабылдау қажет", – деді Олжас Бектенов.
Оның айтуынша, жол ережесін қасақана бұзатындарға қатысты тәсілдерді қайта қарау қажет – мұндай адамдарға айыппұл төлеу кезінде жеңілдіктер берілмеуі тиіс, керісінше, бұзушылықтар санына байланысты сомалар еселеп артуы керек. Сонымен қатар Ішкі істер министрлігі "баллдық" жүйені енгізу тәжірибесін зерттеп, енгізуі қажет.
Ішкі істер министрі Ержан Сәденов ведомствоның бұзушылықтардың саны мен ауырлығын ескеретін "баллдық" жүйені енгізуді зерттеп жатқанын айтты.
"Айыппұлдармен қатар, қайталанған және ауыр бұзушылықтар үшін жүргізуші куәлігінің қолданылуын бір жылға тоқтату көзделуде. Тиісті түзетулерді Құрылтайдың қарауына енгіземіз", – деді ІІМ басшысы.
Бұған дейін Астанада жол ережесін жүйелі түрде бұзған 25 жастағы азамат ұсталған болатын. Hyundai Palisade автокөлігінің жүргізушісінде 2026 жылдың басынан бері 306 жол ережесін бұзу дерегі тіркелген – 169 жылдамдықты асыру және автобус жолағымен 134 рет жүру.
