Жазда Ақтаудың курорттық аймағына ағылатын автокөлік ағыны бес еседен астам артады
Демалыс күндері трафик бұдан да жоғары.
AutoReport редакциясы
Жазда Ақтаудың курорттық аймағына баратын автокөлік ағыны тәулігіне 6,3 мың машинаға жетеді. Бұл қыспен салыстырғанда (1,2 мың) бес еседен астам көп. Ал демалыс күндері трафик тағы екі есе өсіп, 12,2 мың автокөлікке дейін көтеріледі, деп хабарлайды Sergek Group баспасөз қызметі.
Ақтауда жаз мезгілі көлік белсенділігінің шарықтау шегі болып табылады. Күн сайын қала жолдарына 84 мыңға жуық бірегей автокөлік шығады, ал қыста бұл көрсеткіш 79 мыңды құраса, қаңтарда 77 мың автокөлікке дейін төмендейді.
Көліктер күн ішінде де белсендірек қозғалады. Жазда тәулігіне орта есеппен 231 мың сапар жасалады, бұл қысқа қарағанда 14%-ға артық. Көліктің жалпы тәуліктік жүрісі шамамен 2,6 млн шақырымға жетеді, бұл қысқы кезеңнен шамамен 500 мың шақырымға артық.
Сонымен бірге, жағалауға қарай сапарлар санының артуына байланысты кешкі көлік қарбаласының ең жоғары мезгілі сағат 19:00-ден 21:00-ге дейінгі кешірек уақытқа ығысады.
"Жазда Ақтау жолдарындағы әрбір оныншы дерлік автокөлік – басқа өңірлерден келгендер. Ең байқалатын өсімді көршілес батыс аймақтарының тұрғындары қамтамасыз етеді. Атырау облысынан келетін көліктер саны дерлік 70%-ға, Ақтөбеден – 44%-ға, Батыс Қазақстаннан – 30%-ға артады. Сонымен бірге ресейлік тіркеу нөмірлері бар көліктер санының 21%-ға өскені тіркелді. Бұл автотуристердің басым бөлігін жақын маңдағы өңір тұрғындары құрайтынын және Ақтау олар үшін жазғы демалыстың басты бағыттарының біріне айналып отырғанын көрсетеді", – деді Sergek Group СЕО-сы Евгений Ким.
Sergek Group өкілдері көлік санының өсуіне қарамастан, туристік маусым жол желісіне біркелкі емес жүктеме түсіретінін қоса айтты. Негізгі өзгерістер курорттық аймаққа апаратын жолдарда орын алады, ал қалалық магистральдардың басым бөлігі маусымдық ауытқулары шамамен 10% шегінде болатын әдеттегі қозғалыс қарқындылығын сақтайды.
Бұған дейін Sergek ITS мамандары Алматыдағы жол жағдайын талдап, Рамазан айы басталғалы бері қозғалыс қарқындылығындағы өзгерістерді анықтаған болатын. Сарапшылар 2025 жылдың ақпан айы мен наурыз айының басындағы орташа айлық жұмыс күндерінің көрсеткіштерін салыстыра отырып, жолдардың жүктемесінің артуын және ең жоғары қарбалас сағаттардағы өзгерістерді тіркеді. Наурыздың басында Алматыдағы жол жүктемесі 8%-ға артқаны белгілі болды. Бұл ретте сағат 16:00-ден 17:00-ге дейін қозғалыс қарқындылығы 5%-ға төмендесе, 17:00-ден 18:00-ге дейін жолдардағы көлік саны, керісінше, 4%-ға өскен.
