Алматыда «Яндекс» роботаксиі ресми түрде таныстырылды

Көлік министрлігінің баспасөз қызметіның хабарлауынша, Қазақстанда Yandex Qazaqstan-ның пилотсыз роботаксиінің таныстырылымы өтті. Пилоттық жобаларды іске асыру үшін цифрлық инфрақұрылымы дамыған және интеллектуалды көлік жүйелерінің қажетті элементтері бар Алматы мен Астана қалалары ең перспективалы алаңдар ретінде қарастырылуда.

Жоба Көлік министрлігінің интеллектуалды көлік жүйелерін дамытуға және елімізде пилотсыз технологияларды енгізу перспективаларын зерделеуге бағытталған қызметі аясында өткізілді.

Yandex Qazaqstan роботаксиі пилоттық режимнен және шектеулі тестілеуден бастап кезең – кезеңімен іске қосылатын болады. Бұл формат қаладағы нақты жағдайларды ескере отырып технологияларды енгізуге мүмкіндік береді. Сервисте диспетчерлермен тәулік бойы байланыс және сапарларды сақтандыру жоспарлануда. Пилотсыз көлікті басқару жүйесі автономды жүргізудің дәлелденген тәсілдеріне негізделеді, соның ішінде ЖИ, жол жағдайын үнемі бақылау және ойластырылған қауіпсіз әрекет ету сценарийлері. Тәжірибе жинақталып, тұрақтылық расталған жағдайда, қызмет ауқымы кеңейетін болады.

Көлік министрлігінің хабарламасында “Мемлекет президентінің тапсырмасы бойынша Көлік министрлігі роботаксилерді пайдалану үшін нормативтік-құқықтық базаны қалыптастыру бағытында жүйелі жұмыс жүргізуде. Роботаксилерді пайдаланудың негізгі ұғымдарын енгізуді, оларды пайдалану тәртібін айқындауды, мемлекеттік органдардың өкілеттіктерін бөлуді және қажетті құқықтық инфрақұрылымды құруды көздейтін заңнамалық түзетулер әзірленді”, - делінген.

Ведомства өкілдерінің айтуынша әлемдік тәжірибе көрсеткендей, пилотсыз технологиялар қазірдің өзінде бірқатар елдерде сәтті енгізіліп жатыр. Қазақстан үшін оларды жүзеге асыру экономиканың жоғары технологиялық секторларын дамыту үшін жаңа мүмкіндіктер ашады.

Бұған дейін Жасанды интеллект және цифрлық даму министрлігі InDrive компаниясымен 2026 жылы Астанада пилотсыз такси іске қосу туралы меморандумға қол қойған болатын.