Toyota, Volkswagen және Hyundai 2026 жылдың I тоқсанында әлемдік нарықта көш бастады

Car Industry Analysis хабарлауынша, 2026 жылдың I тоқсанының қорытындысы бойынша әлемдік нарықтағы сату көшбасшыларының үздік үштігіне Toyota, Volkswagen және Hyundai брендтері орнықты.

Сонымен қатар, Toyota мен Volkswagen сатылымында сәл төмендеу байқалады. Бұл қытайлық автобрендтер тарапынан өскен бәсекелестікпен түсіндіріледі. Volkswagen көрсеткіштерінің төмендеуі дәл осы Қытай нарығында байқалып отыр.

Үздік ондыққа енген брендтердің ішінде сату өсімін көрсеткен жалғыз брендтер — Suzuki мен Kia болды. Жапондық компания қытайлық автокөліктер жоқ Үндістан нарығындағы жоғары көрсеткіштерінің арқасында рейтингте төртінші орынды иеленді. Kia, Hyundai-мен қатар, көптеген нарықтарда тұрақты нәтижелер көрсетуде. Сондай-ақ, АҚШ-та олардың гибридті автокөліктері танымалдылық жинап келеді.

Өткен жылдың I тоқсанында осы рейтингте үшінші орында болған BYD бұл жылы 10-орынға жайғасты. Компания экспорт көлемін арттырғанымен, ішкі нарықтағы сатылымдары едәуір төмендеді.

2026 жылдың I тоқсанында ең көп сатылған автокөліктердің брендтер бойынша үздік ондығы:

• Toyota – 2,3 млн-ға жуық сату (2025 жылдың I тоқсанымен салыстырғанда -2%);
• Volkswagen – 1,1 млн (-6%);
• Hyundai – 933 984 (-2%);
• Suzuki – 902 000 (+3%);
• Ford – 899 400 (-4%);
• Nissan – 811 684 (-5%);
• Kia – 802 493 (+1%);
• Honda – 790 200 (-9%);
• Chevrolet – 680 000 (-3%);
• BYD – 615 913 (-35%).

Үздік ондыққа енбей қалғандардың арасынан сатылымы қайта өсіп жатқан Tesla-ны атап өтуге болады. Бренд 358 мың өткізілген электромобильмен рейтингте 16-орынға орнығып, 360,1 мың сатылымы бар Audi-ге жақындады.

Рейтингте 26-орынға табан тіреген MG брендінің көрсеткіштерінде айтарлықтай өсім байқалады. Компания Қытайдан тыс жерлерге экспорт көлемін ұлғайтып, бұл оған 267,8 мың автокөлік сатуға мүмкіндік берді. Бұл 2025 жылдың I тоқсанымен салыстырғанда 63%-ға артық.

MG-ден кейін жергілікті нарықта өте танымал үндістандық Tata бренді келеді. Компания 265,8 мың автокөлік сатты, бұл өткен жылдың I тоқсанымен салыстырғанда үштен бірге артық.

Еуропадағы табыстың арқасында Omoda мен Jaecoo брендтері өз сатылымдарын жиынтық түрде екі еседен астамға арттырды. Осы рейтингте компаниялар 158,2 мың өткізілген автокөлікпен 36-орынға жайғасты.

Еске сала кетейік, 2026 жылдың I тоқсанында Қазақстанда 44,8 мыңға жуық жаңа автокөлік сатылды. Отандық нарықтың көшбасшылары Hyundai (8 658 автокөлік сатылды; 2025 жылдың қаңтар-наурызымен салыстырғанда -25,8%), Kia (7 493; +52,8%) және Chevrolet (6 629; +10,3%) брендтері болды.