Қыркүйекте Қазақстанда 19 мыңнан астам жаңа көлік сатылды

2026 жылдың қыркүйек айында Қазақстанда ресми дилерлер 19 309 жаңа жеңіл және коммерциялық автокөлікті сатты. Бұл – Қазақстан автокөлік одағының баспасөз қызметінің хабарлауынша, тамыз айымен салыстырғанда 1,1%-ға, ал өткен жылдың қыркүйегімен салыстырғанда 5,2%-ға артық.

Есепті айда ең көп сатылым мына брендтерде тіркелді: Chevrolet (3 067 сатылым; 2025 жылдың қыркүйегімен салыстырғанда +4,2%), Hyundai (2 932; -29,5%) және Kia (2 584; +29,1%). Модельдер бөлінісінде – Chevrolet Cobalt (2 906 сатылым), Kia Sportage (1 187) және Hyundai Tucson (985).

"Бүгінде Қазақстанның автосалондарында жаңа автокөлік сатып алуды қолжетімді ететін қаржылық өнімдер мен клиенттерді қолдау бағдарламаларының кең спектрі жұмыс істейді. Стандартты автонесиелеуден бөлек, сатып алушылар өндірушілер мен дилерлердің арнайы ұсыныстарын, сондай-ақ trade-in бағдарламаларын пайдалана алады. Мұндай құралдар сұранысты қолдап, елдің автопаркін жаңартуға ықпал етеді", – деді Қазақстан автокөлік одағының президенті Анар Макашева.

2026 жылдың қаңтар-қыркүйек айларында Қазақстанда ресми дилерлер барлығы 165 678 жаңа жеңіл және коммерциялық автокөлікті сатты. Бұл – өткен жылдың сәйкес кезеңімен салыстырғанда 2,6%-ға артық.

2026 жылғы қаңтар-қыркүйек аралығында Қазақстандағы сату деңгейі бойынша үздік 10 бренд:

• Hyundai – 27 495 сатылым (2025 жылдың қаңтар-қыркүйегімен салыстырғанда -22,7%);
• Chevrolet – 26 272 (+14,7%);
• Kia – 18 964 (+7,8%);
• Changan – 15 645 (+104,2%);
• Chery – 11 994 (+17,4%);
• Haval – 9 656 (+16,3%);
• Jetour – 8 668 (-16,7%);
• Toyota – 7 287 (-5,2%);
• JAC – 6 771 (-8,3%);
• Geely – 5 245 (-30,4%).

Бұған дейін Автомобиль нарығын мониторингтеу және талдау агенттігінің директоры Артур Мискарян AutoReport редакциясына 2026 жылдың қорытындысы бойынша Қазақстанда жаңа автокөліктерді сату көлемі өзінің рекордын тағы да жаңартатыны туралы болжамымен бөліскен болатын. Еске сала кетсек, 2025 жылы 234 мың сатылған көлік бойынша тарихи максимумға қол жеткізілді.