2024 жылы шыққан автокөлік 2025 жылдың желтоқсанында автосалоннан 15,5 млн теңгеге сатып алынды. Дилердің арнайы акциясы аясында бес рет тегін техникалық қызмет көрсету мүмкіндігінің берілуі жағымды бонус болды.

Отбасыда екінші бала дүниеге келгенде, көлік таңдаудағы басымдықтар түбегейлі өзгереді екен. Кәдімгі кроссоверлер үлкен отбасыға қажетті еркіндік пен жайлылықты бере алмайды. Бізге күнделікті қалалық қарбаласқа да, ұзақ сапарларға да ыңғайлы, іші кең әрі жайлы автокөлік керек болды. Таңдауымыз Hyundai Custin-ге түсті. Міне, бірнеше ай бойы белсенді мінгеннен кейін алғашқы шынайы қорытындыларыммен бөлісуге дайынмын.

Жүру сипаттамалары

Custin капотының астында 170 аттың күші бар, көлемі 1,5 литрлік турбоқозғалтқыш орнатылған, ол классикалық сегіз сатылы автомат қорабымен бірге жұмыс істейді. Жетегі – тек алдыңғы. Бұл отбасылық лайнердің салмағы 1,7 тоннадан сәл асады, бірақ турбомотордың тарту күші жеткілікті.

Travel жиынтығында автокөлік 17 дюймдік жеңіл қорытпалы дискілермен жабдықталған. Шина профилінің биіктігі арқасында көлік жұмсақ жүреді, асфальттың тегіс емес жерлерін білдіртпейді. Егер жолдағы шұңқырлар тым терең болмаса, Custin-мен қала сыртына да сенімді түрде сапарға шығуға болады.

Жанармай шығыны жүргізу стиліне тікелей байланысты. Тасжолда: сабырлы қалыппен жүргенде 100 шақырымға 8-9 литр жанармай жұмсалады. Қалада: ауқым кеңірек. Демалыс күндері немесе жол бос кезде шамамен 8,5 литр кетеді, бірақ кептелісте, кондиционер қосылып тұрғанда немесе қыста моторды жылытқан кезде шығын 15 литрге дейін өсуі мүмкін.

Ұзақ отбасылық сапарлар үшін мен қосымша көлденең рейлингтер мен 700 литрлік үлкен автобокс сатып алдым. Оны тек қажет болғанда, барынша көп зат алу керек кезде ғана орнатамын – онымен бірге Custin нағыз крейсерге айналады.

Интерьер және мультимедиа

Салонның ашық түсі оны визуалды түрде кеңірек көрсетіп, үйдің жайлылығындай сезім ұялатады. Алдыңғы панель мен рөлдің эргономикасы мұқият ойластырылған: барлық басқару элементтері қолжетімді жерде, цифрлық индикация мен мультимедианы түсіну өте оңай. Алдыңғы орындықтар толыққанды жайлылық сыйлайды – қыста жылытатын, ал жаздың аптап ыстығында құтқаратын желдету жүйесі бар.

Екінші қатардың басты ерекшелігі – жеке реттелетін сәнді капитандық (оттоман) орындықтар. Мұндағы жолаушылар өздерін бизнес-кластағыдай сезінеді. Үшінші қатар шағын диван іспетті, бірақ балалар немесе ересектердің қысқа қашықтыққа жүруі үшін әбден жеткілікті. Ең маңыздысы – үшінші қатарға өту өте ыңғайлы, жолаушылар екінші қатардағы бөлек орындықтардың арасынан емін-еркін өте алады.

Көліктің жиынтығы – Travel. Салоннан шыққан бойда көлікті өзіме ыңғайлап «жетілдіруге» кірістім: сапалы қысқы шиналар сатып алдым, сондай-ақ автооталдыру жүйесі бар StarLine дабылын және алды-артын бірдей түсіретін екі арналы бейнетіркеу құралын орнаттым. Сонымен қатар, толық шуоқшаулау жасалды. Мұндай көлемдегі минивэндерге зауыттық шуоқшаулау көбіне жетіспей жатады, ал бұл процедурадан кейін салон ішінде премиум-классқа тән тыныштық орнады.

Қазіргі уақытта көлік ресми кепілдікте тұр, ал жүрілген жолы 15 мың шақырымды құрайды.

Travel vs Luxe: айырмашылығы неде

Қазақстан нарығында қос нұсқа да бірдей 1,5 литрлік турбомотормен және алдыңғы жетекпен жабдықталған, бірақ басты айырмашылық жайлылық детальдарында. Luxe топтық жиынтығында екі бүйірлік есік пен жүк салғыш электр жетегімен жабдықталған (Travel нұсқасында олар қолмен ашылады). Luxe нұсқасында артқы есіктердің терезелерінде күннен қорғайтын перделер орнатылған (Travel-де жоқ) және дизайны өзгеше 18 дюймдік дискілермен келеді.

Иә, Luxe қауіпсіздік пен ыңғайлылық тұрғысынан жағымды «бонустар» ұсынады, бірақ Travel де өз бағасына сай теңгерімді әрі тиімді таңдау болды.

15 мың шақырымнан кейінгі түйін

Жалпы, Hyundai Custin өзін тек жақсы жағынан көрсетіп келеді. Көлік өзіміз үшін және ел ішінде отбасымен саяхаттау үшін сатып алынды – бұл міндетті ол 10-нан 10 ұпайға орындап тұр. Пайдаланудың барлық кезеңінде бұзылуды немесе техникалық ақауды кездестірмедім.

Тек отбасылық қолданыстан бөлек, бұл көлік қалааралық, тіпті халықаралық жолаушылар тасымалына да өте қолайлы – ұзақ жол жүргендегі жайлылық деңгейі жоғары.

Кеңдік, жайлылық және жұмсақ жүріс маңызды болатын отбасылы адам үшін бұл – өз бағасына нарықтағы ең үздік нұсқалардың бірі. Custin өзіне салынған бюджетті толық ақтайды және әрбір сапарда сенімділік ұялатады. Алда жаңа шақырымдар мен жаңа белестер күтіп тұр, бұл минивэн біздің сеніміізді ақтайды деп ойлаймын.