Қазақстанда жаңартылған Audi A6 көлігінің сатылымы басталды

Қазақстанда C9 шанағындағы жаңа буын Audi A6 моделінің сатылымы басталды. Автокөліктің құны 44 млн теңгеден басталады, деп хабарлайды брендтің отандық нарықтағы дистрибьюторы – Orbis Auto компаниясының баспасөз қызметі.

Жаңа Audi A6 екі нұсқада қолжетімді: қуаттылығы 272 ат күшіне тең екі литрлік қозғалтқышпен және қуаттылығы 367 ат күшіне тең үш литрлік қозғалтқышпен. Барлық автокөліктер quattro толық жетек жүйесімен, артқы осьті басқару функциясымен, адаптивті пневматикалық аспамен және Audi drive select жүйесімен жабдықталған.

"Негізгі техникалық өзгерістердің бірі – аэродинамика. Жаңа Audi A6 Sedan іштен жану қозғалтқышы бар Audi сериялық модельдерінің тарихындағы ең үздік аэродинамикалық қарсылық көрсеткіштерінің бірін көрсетеді: Cd коэффициенті 0,23-ті құрайды. Бұл тек тиімділікке ғана емес, сонымен қатар жоғары жылдамдықпен жүру кезіндегі акустикалық жайлылыққа да әсер етеді", – делінген Orbis Auto хабарламасында.

Салон архитектурасы Audi Digital Stage тұжырымдамасы аясында құрылған – жүргізуші мен жолаушының алдында виртуалды аспаптар панелі, орталық MMI дисплейі және жиынтығына байланысты алдыңғы жолаушыға арналған бөлек MMI дисплейі бар кең сандық интерфейс орналасқан. Көлденең Softwrap архитектурасы салонды визуалды түрде кеңейтіп, тұтас премиум кеңістік сезімін ұялатады.

Сондай-ақ, жаңа буында шанақтың дыбыс оқшаулауы жақсартылып, есіктер мен терезелердің тығыздағыштары оңтайландырылған, сонымен қатар шиналар мен трансмиссиядан шығатын шуды азайтатын шешімдер қолданылған.

Еске сала кетейік, Audi A6 премиум седаны брендтің физикалық батырмалар қайта оралған модельдерінің бірі болды. Audi өкілдері бұл шешімнің клиенттердің қалауы бойынша қабылданғанын түсіндірді.