Қазақстанда электромобильдер мен гибридтердің сатылымы үш есеге өсті
Сатылым көшін BYD, Geely Galaxy және Li Auto бастады.
AutoReport редакциясы
2026 жылғы қаңтар-тамыз аралығында Қазақстанда жаңа энергия көздерімен жүретін (NEV) алты мың автокөлік сатылды. Бұл өткен жылдың сәйкес кезеңімен салыстырғанда үш есе көп, деп хабарлайды Қазақстанның Автокөлік одағының баспасөз қызметі.
Сатылымның негізгі бөлігі қайта қуатталатын гибридтерге (PHEV) және жүріс қоры ұлғайтылған автокөліктерге (EREV) тиесілі – олар 2026 жылы Қазақстандағы NEV нарығының 72,5%-ын құрады. Барлығы 4 351 PHEV және EREV автокөлігі сатылды. Бұл 2025 жылғы қаңтар-тамыз айларымен салыстырғанда төрт еседен астам көп. Ал толық электрлі автомобильдердің (BEV) сатылымы өткен жылмен салыстырғанда 74,8%-ға өсіп, 1 652 бірлікке жетті.
"Сатып алушылар көбіне күнделікті сапарға жарайтын электромобильдерді қарайды, бірақ алыс жолға шыққанда көлік құралын қалай пайдаланатынын ескереді. Сондықтан көбі қазір қуатталатын гибридтер мен жүріс қоры ұлғайған модельдерді сұрайды", – деді Қазақстанның автокөлік одағының президенті Анар Мақашева.
2026 жылғы қаңтар-тамыз айларындағы сатылым көлемі бойынша Қазақстандағы NEV нарығының көшбасшылары:
- BYD – 3 208 автокөлік сатылды;
- Geely Galaxy – 1 244;
- Li Auto – 888;
- Zeekr – 214;
- ROX – 131.
Модельдер бөлінісінде ең жоғары сұраныс Geely Galaxy EX5 EM-i (1 205 сатылым) және BYD Song Plus DM-i (1 196), BYD Song Plus EV (576), BYD Chazor (572), BYD Yuan Up (555), Li L6 (504), Li L7 (257), BYD Sealion 7 (137), ROX 01 (131) және Li L9 (126) автомобильдеріне түсті.
Сондай-ақ 2026 жылы ресми дилерлер классикалық гибридті күштік қондырғысы (HEV) бар 1 284 автокөлік сатты. Бұл 2025 жылғы қаңтар-тамыз айларымен салыстырғанда 6,2%-ға көп. Бұл сегменттегі сатылым көшін Toyota (1 208), Lexus (63) және Porsche (13) автомобильдері бастады.
Қазақстанның автокөлік одағының мәліметінше, 2026 жылғы қаңтар-тамыз аралығында Қазақстанда барлығы 146 372 жаңа жеңіл және коммерциялық автокөлік сатылды. Бұл өткен жылдың сәйкес кезеңімен салыстырғанда 2,3%-ға көп. Жыл басынан бері автокөлік нарығының көшбасшылары – Hyundai (24 563 сатылған автокөлік; 2025 жылғы қаңтар-тамызбен салыстырғанда -21,8%), Chevrolet (23 205; +16,2%) және Kia (16 380; +5,1%).
