Mitsubishi жаңартылған Pajero моделін таныстырды

Mitsubishi Motors жаңартылған Pajero моделін таныстырды. Компания бұл модельді флагмандық ретінде айқындап, оны әлемдік нарықтарға біртіндеп шығарады.

Жаңа Mitsubishi Pajero 2,4 литрлік турбоүрлеуі бар дизельді қозғалтқышпен және сегіз сатылы автоматты беріліс қорабымен жабдықталған. Ең жоғары айналу моменті 480 ньютон-метрді құрайды.

Автокөліктің ұзындығы 4 920 миллиметр, ені 1 925 миллиметр және биіктігі 1 910 миллиметр, алдыңғы және артқы дөңкелектерінің арақашықтығы 1 630 миллиметр және дөңгелек базасы 2 870 миллиметр. Сондай-ақ модель 230 миллиметрлік клиренсті 30,4 градустық кіру бұрышымен, 22,6 градустық кедергілерден өту бұрышымен және 25,8 градустық шығу бұрышымен үйлестіреді. Алдыңғы және артқы остер арасындағы салмақтың оңтайландырылған үлестірілуі 52:48 құрайды.

"Көпжылдық ралли тәжірибесі мен күрделі жағдайлардағы әзірлемелер негізінде жасалған сатылы типтегі жоғары берік рама мүлдем жаңа Pajero-ның негізі болып табылады. Жоғары беріктігі бар болатты кеңінен пайдалану салмақты төмендетуге ықпал етеді, ал раманың көлденең қимасының ауданын ұлғайту сияқты шаралар бұралу мен майысуға төзімділікті едәуір арттырып, басқару кезіндегі жоғары тұрақтылық пен жүріс жайлылығын, сондай-ақ жоғары төзімділік пен сенімділікті қамтамасыз етеді", – делінген Mitsubishi Motors хабарламасында.

Аспасы тәуелсіз екі иінді алдыңғы осьті және жақында әзірленген бес иінді қатаң артқы осьті қамтиды. Ол шиналардың жолмен жанасуын сақтауға көмектесетінінің және жолсыз жерде жоғары өтімділікті қамтамасыз ететінінің арқасында, табиғи басқару мен тегіс, сенімді жүрісті кепілдендіреді.

Салонда үш қатар орындық бар. Оның үстіне жүргізуші орындығы жоғарырақ орналасқан, бұл анағұрлым жоғары шолу нүктесін қамтамасыз етеді және жүргізушіге автокөліктің габариттерін бағалауды жеңілдетеді. Екінші қатар орындықтардың 150 миллиметрлік үлкен жылжу диапазоны мен жиналу механизмі бар.

Жаңа Mitsubishi Pajero 2027 жылдың наурыз айының соңына дейін Жапония мен Австралияда сатуға түседі, одан кейін компания модельді АСЕАН, Латын Америкасы және Таяу Шығыс елдерінің нарықтарын қоса алғанда, әлемнің 100-ге жуық елінде іске қосады.

Бұған дейін Mitsubishi жаңа модель – Nissan Leaf базасында әзірленген Eclipse Sportback шағын электромобилін таныстырған еді. Жаңа өнім спорттық жеңіл балқымалы дискілермен, L-тәрізді бұрылыс көрсеткіштерімен және сәл өзгертілген алдыңғы бампермен жабдықталған.