BMW жаңартылған X5 моделін таныстырды

Неміс автоөндірушісі BMW X5 кроссоверінің бесінші буынын таныстырды. Автокөліктерге алдын ала тапсырыс қабылдау 2026 жылдың қазан айында басталады. Көліктер 2026 жылдың тамыз айынан бастап Спартанбургтегі (Оңтүстік Каролина штаты, АҚШ) зауытта шығарыла бастайды, деп хабарлайды BMW Group баспасөз қызметі.

Жаңа BMW X5 бес түрлі күштік қондырғы нұсқасымен — бензинді, дизельді, гибридті және толықтай электрлі модельдерде ұсынылады, сонымен қатар автокөліктің сутегімен жүретін нұсқасы да әзірлену үстінде.

Электрлі BMW iX5 60 xDrive моделі алтыншы буындағы BMW eDrive технологиясы мен 800 вольттық архитектура негізінде жасалған. Бұл модельдің WLTP циклі бойынша 845 шақырымға дейін жүру қорын қамтамасыз етеді. Екі электр қозғалтқышы жүйенің жалпы қуатын 425 киловаттқа немесе 578 ат күшіне жеткізеді.

X5 гибридті модельдері бензинді қозғалтқыштарды электромотормен ұштастырады. BMW X5 50e xDrive жалпы қуаты 360 киловатт немесе 489 ат күшін дамытады және WLTP циклі бойынша тек электр жетегімен 102 километрге дейін жүре алады. BMW X5 M60e xDrive моделі 460 киловатт немесе 612 ат күші қуатын және электр жетегімен 98 километрге дейінгі жүріс қорын ұсынады. Екі модель де тек электрлі режимде сағатына 140 километрге дейінгі жылдамдықты ала алады.

BMW компаниясының мәлімдеуінше, бензинді және дизельді нұсқалардағы 48 вольтты «жұмсақ гибридті» технология іштен жану қозғалтқышының орнынан тиімдірек қозғалуы мен жылдамдық алуы үшін оған электрлік қолдауды қамтамасыз етеді. BMW X5 40 xDrive (бензин) моделінің қуаты 294 киловатт немесе 400 ат күшін, ал BMW X5 40d xDrive (дизель) моделінің қуаты 230 киловатт немесе 313 ат күшін құрайды.

Автокөліктің орталық сандық элементі — BMW Operating System X операциялық жүйесі бар BMW Panoramic iDrive жүйесі. BMW Panoramic Vision жүйесі контентті алдыңғы әйнектің төменгі бөлігінің бүкіл еніне проекциялайды, бұл ретте жүргізуге қатысты негізгі ақпарат тікелей жүргізушінің көру аймағында орналасады. Жүйе BMW 3D Head-Up Display проекциялық дисплейімен, 17,9 дюймдік орталық дисплеймен және қосымша таңдалатын BMW Passenger Screen жолаушылар экранымен толықтырылған.

Сондай-ақ, жаңа BMW X5 стандартты жиынтықта орнатылатын адаптивті аспамен және осьтерге салмақтың 50:50-ге жуық тең бөлінуімен жабдықталған. Қосымша опция ретінде шассиді адаптивті басқару (Adaptive Chassis Control), сондай-ақ алғашқыда барлық толықтай электрлі және қуатталатын гибридті (plug-in) модельдер үшін қолжетімді болатын, қисаюды тұрақтандыру жүйесі бар Adaptive Chassis Control Professional ұсынылады.

Жүргізушіге көмекші жүйелерге келетін болсақ, жүргізудің жеке ерекшеліктеріне бейімделген зияткерлік қолдауды қамтамасыз ететін BMW Symbiotic Drive, екінші деңгейдегі озық жүргізушіге көмекші жүйелер және белсенді қауіпсіздік функциялары бар. Компания өкілдері BMW Soft-Stop жүйесі BMW тарихындағы ең бірқалыпты әрі жұмсақ тежелуді қамтамасыз ететінін айтады.

2026 жылдың маусым айының басында Қазақстанда жаңа электрлі BMW iX3 кроссоверінің таныстырылымы өтті. Автокөлік дилерлік орталықтарда сатылымға шықты, оның құны 50,3 млн теңгеден басталады.